3 декабрь, Шәмбе

16 август 2011 йыл, 13:11

Уртаса эш хаҡы Өфөлә – 23800 һум

автор: Евгений Рәхимҡолов

Ағымдағы йылдың тәүге ете айы йомғаҡтары буйынса уртаса эш хаҡы кимәле Өфөлә 23800 һумға етте. Был хаҡта Өфө хакимиәтендә үткән оператив кәңәшмәлә ҡала башлығы Павел Качкаев хәбәр итте.

Был Рәсәй буйынса уртаса күрһәткестән юғарыраҡ, һәм уның менән Өфө илдең миллионлы ҡалалары араһында өсөнсө урынды биләй (Мәскәү менән Санкт-Петербургты иҫәпкә алмағанда). Уртаса эш хаҡы Екатеринбургта һәм Новосибирскиҙа ғына юғарыраҡ. Әммә был күрһәткес буйынса Өфө, Павел Качкаев әйтеүенсә, Екатеринбургҡа етеп килә.

Бер йылда уртаса эш хаҡы Өфөлә 12 процентҡа тиерлек артҡан. Сағыштырыу өсөн, 2010 йылдың көҙөндә ул 21 165 һум тәшкил итһә, быйыл майҙа 23 400 һум булған.