11 декабрь, Йәкшәмбе

07 июль 2011 йыл, 10:20

БР мосолмандары Диниә назаратының йәштәр бүлеге ярҙамында 20 ғаилә ҡоролған

автор: Тимур Рәхмәтуллин

Башҡортостан Республикаһы мосолмандары Диниә назаратының Йәштәр бүлеге ярҙамында 20 ғаилә барлыҡҡа килде, тип хәбәр итте бүлек етәксеһе Айнур Арсланов.

Йәштәр бүлеге хеҙмәткәрҙәре егеттәр һәм ҡыҙҙарға шәхси мәғлүмәттәрен тултырыу өсөн анкеталар әҙерләй. Бынан һуң осрашыуҙар, бергәләп сәй эсеү, саф һауала йөрөү, мәҙәни һәм спорт саралары ойошторола, был арала йәш мосолмандар таныша, аралаша һәм һөҙөмтәлә ғаилә ҡора.

— Беҙҙең танышыу клубының бер йыл эшләү дәүерендә 500-гә яҡын йәштәр анкета тултырҙы, — ти Айнур Арсланов. – Беҙҙең иҫәптә 20-нән ашыу никах бар.  Хәҙер йәш ғаиләләрҙең күбеһе сабый көтә.

Айнур хәҙрәттең әйтеүенсә, кисә лә ул йәштәргә никах уҡыған. Бик йыш йәштәрҙе БР мосолмандары Диниә назараты рәйесе мөфтөй Нурмөхәмәт Ниғмәтуллин да никахлаштыра.

— Беҙ никах үткәрәбеҙ, һәм барыһы ла шәриғәт ҡанундары буйынса эшләнә, — тип билдәләне ул. – Ғаиләләрҙең барыһы ла никахын мотлаҡ рәүештә ЗАГС-та теркәй.