10 декабрь, Шәмбе

06 июль 2011 йыл, 16:54

«Ирәндек» ансамбле Испанияла халыҡ-ара фольклор фестивалендә ҡатнашасаҡ

автор: Әлфиә Әһлиуллина

Башҡорт дәүләт университетының «Ирәндек» халыҡ бейеү ансамбле Испанияла халыҡ-ара фольклор фестивалендә ҡатнашасаҡ. Ул ЮНЕСКО яҡлауында Испанияның боронғо Хака ҡалаһында 31 июлдән 16 авгусҡа тиклем буласаҡ. Фестивалдә «Ирәндек» беҙҙең республика исеменән сығыш яһаусы берҙән-бер ҡатнашыусы һәм Рәсәй исеменән сығыш яһаусы ике коллективтың береһе буласаҡ, тип хәбәр иттеләр «Башинформ» агентлығына юғары уҡыу йортоноң матбуғат хеҙмәтендә.

Иҫегеҙгә төшөрәбеҙ, ансамбль халыҡ-ара фестивалдәрҙә үҙенең уникаль оҫталығын бер генә күрһәтмәне. Һуңғы ун йыл эсендә генә «Ирәндек» Халыҡ-ара Аксаков байрамының, Одессала «Күңелле йәйғор» Халыҡ-ара фестиваленең, Италияла, Болгарияла, Чехияла, Францияла үткән фольклор фестивалдәренең ҡатнашыусыһы булды.