9 декабрь, Йома

24 май 2011 йыл, 10:44

Башҡортостанда 75 мең ғаилә торлаҡҡа сиратта тора

автор: Рәсүл Хәмиҙуллин

Бөгөн Башҡортостандағы ғаиләләрҙең биш проценты самаһы, анығыраҡ әйткәндә, 75 мең ғаилә, торлаҡҡа сиратта тора. Был хаҡта Башҡортостан юлдаш телевидениеһында тура эфирҙа тамашасылар һорауҙарына яуап биргәндә республика Президенты Рөстәм Хәмитов белдерҙе.

— Торлаҡ алырға теләүселәр төрлө категориянан. Ветерандар ҙа, инвалид балаларҙың ата-әсәләре лә, хәрби хәрәкәттәрҙә ҡатнашыусылар ҙа бар. Беҙгә 40 мең самаһы фатир табырға кәрәк, — тип билдәләне Рөстәм Хәмитов. – Уларҙың яртыһы – федераль бюджет иҫәбенә, икенсе яртыһы республика бюджетынан финансланасаҡ.

Республика башлығы һүҙҙәренсә, был бик ҙур сумма, һәм уларҙы алдағы ике йылда ғына табып булмаясаҡ.

— Эшләргә, бюджетты тулыландырырға кәрәк. Беҙгә яңы эш урындары, яңы производство кәрәк, — тине Президент. – Бер генә юлыбыҙ бар – байыраҡ булырға. Беҙ икенсе кешеләргә әйләнергә тейешбеҙ, һәр ваҡыт башҡалар артынан ҡыуыусы була алмайбыҙ. Башҡортостан – шәп, ҡеүәтле, ҙур потенциалы булған республика. Һәм бюджетыбыҙ ҙа беҙҙең ҙурыраҡ булырға тейеш.