4 декабрь, Йәкшәмбе

13 май 2011 йыл, 9:13

Өфөгә Германиянан балалар делегацияһы килде

автор: Евгений Рәхимҡолов

Өфөгә 23 уҡыусынан һәм уларҙың уҡытыусыларынан торған Германия делегацияһы килде. Балалар уҡыусылар менән алмашыу буйынса 2005 йылда төҙөлгән килешеүгә ярашлы Айслинген ҡалаһының Эрих Кестнер исемендәге гимназияһынан килде. Башҡортостанға уларҙың беренсе тапҡыр килеүе.

Өфө хакимиәтенең мәғлүмәт-аналитика бүлеге хәбәр итеүенсә, Германия балаларын кисә ҡала хакимиәтендә ҡабул иткәндәр. Ҡунаҡтар менән ҡала башлығы урынбаҫары Сынтимир Баязитов осрашҡан.

Немец балаларының Өфөгә визиты 14 майға тиклем дауам итәсәк. Был арала улар өсөн ҡала һәм республика буйынса экскурсиялар ойоштороласаҡ. Сынтимер Баязитовтың әйтеүенсә, Өфөнөң Германия ҡалалары менән дуҫлығы 40 йылдан ашыу дауам итә. Ҡайһы берҙәре, атап әйткәндә, Галле ҡалаһы менән, Өфө туғандаш ҡалалар булып киткән.  

Быйыл сентябрҙә Өфө уҡыусыларының да Германияға ошондай уҡ сәфәре планлаштырыла.