7 декабрь, Шаршамбы

06 май 2011 йыл, 17:35

Башҡортостан Торлаҡ-коммуналь хужалыҡ фондынан капремонтҡа миллиардҡа яҡын аҡса аласаҡ

автор: Ғәлиә Нәбиева

6 майҙа Торлаҡ-коммуналь хужалыҡты реформалаштырыуға булышлыҡ итеү фонды дәүләт корпорацияһы идараһы Башҡортостандың 2011 йылға күп фатирлы йорттарға капиталь ремонт үткәреү һәм граждандарҙы авария хәлендәге торлаҡтан икенсеһенә күсереү өсөн финанс ярҙамы күрһәтеүгә заявкаһын ыңғай хәл итте.

Хупланған заявкаға ярашлы, республика Торлаҡ-коммуналь хужалыҡты реформалаштырыуға булышлыҡ итеү фонды средстволарынан  980,71 млн. һум аласаҡ, тип хәбәр иттеләр дәүләт корпорацияһынан. Был аҡсалар территорияла 75 күп фатирлы йортҡа капиталь ремонтҡа, шулай уҡ 9 муниципаль берәмектәге 107 авария хәлендәге йорттарҙан граждандарҙы икенсеһенә күсереүгә йүнәлтеләсәк. Үрҙә билдәләнгән программаларҙы бойомға ашырыу һөҙөмтәһендә төбәктә 19 451 кеше торлаҡ шарттарын яҡшыртасаҡ.

Хәтерегеҙгә төшөрәйек, 2008-2010 йылдарҙа Башҡортостанға күп фатирлы йорттарға капиталь ремонт үткәреү һәм граждандарҙы авария хәлендәге торлаҡтан күсереү программаларын тормошҡа ашырыу өсөн, шул иҫәптән торлаҡ баҙары үҫешен дәртләндереү кәрәклеген иҫәпкә алып, ТКХ фонды средстволарынан 8,8 млрд, һум бүленгәйне. Ҡушып финанслау тәртибендә төбәк был суммаға 2,4 млрд. һум өҫтәне. Үрҙә күрһәтелгән программаларҙы тормошҡа ашырыу һөҙөмтәһендә төбәктә 981 күп фатирлы йортта капиталь ремонт үткәрелде һәм 306 авария хәлендәге йорттарҙа йәшәүселәр икенселәренә күсерелде, 193 653 кеше торлаҡ шарттарын яҡшыртты.