6 декабрь, Шишәмбе

12 апрель 2011 йыл, 13:39

Көньяҡ Уралда башҡорт тоҡомло бал ҡорттарын күпләп үрсетергә йыйыналар

автор: Галина Бахшиева

Йылайыр районы башҡорт тоҡомло бал ҡорттарын һәм инә ҡорттарын күпләп үрсетеү менән шөғөлләнәсәк. Башҡортостандың тап ошо районын белгестәр тәбиғәт һәм климат шарттары буйынса умартасылыҡ өсөн иң уңайлыларҙың береһе тип иҫәпләй. Өҫтәүенә, бында умартасылыҡты уңышлы үҫтереү һәм умартасылыҡ инвентарын әҙерләү өсөн етди нигеҙ бар.  

Тоҡомло башҡорт бал ҡорттарын үрсетеү буйынса тоҡомсолоҡ репродукторы элекке «Һүрәм» умартасылыҡ совхозы (әлеге Йылайыр районының Дмитриевка ауыл советы) биләмәһендә булған умарталыҡтар нигеҙендә ойоштороласаҡ.

Көньяҡ Уралдың ошо уҡ районында үҙенең умартасылар ойошмаһы булдырыласаҡ, ул төбәктә башҡорт тоҡомло бал ҡорттарын һаҡлау, үрсетеү мәсьәләләрендә ярҙам итергә һәм уларҙың киң таралыуына булышлыҡ итергә тейеш.