7 декабрь, Шаршамбы

31 март 2011 йыл, 16:08

Башҡортостанды яҡын арала иҡтисадтың ҙур үҫеше көтә - Standard & Poor's

автор: Әлфиә Шәрәфетдинова | фото: Андрей Старостин

Башҡортостан Президенты Рөстәм Хәмитов бөгөн Республика йортонда Standard & Poor's рейтинг агентлығы аналитиктары менән осрашты.

— Беҙ Башҡортостан Республикаһы менән күп йылдар дауамында эшләйбеҙ, — тине осрашыуҙан һуң үткән брифингыла агентлыҡ вәкиле Борис Копейкин. — Әле бында инвесторҙар менән үҙ-ара мөнәсәбәттәрҙә бихисап үҙгәрештәр бара, ә идаралыҡҡа килгәндә — барлыҡ ошо мәсьәләләрҙе тикшереү өсөн бөгөн беҙ республика етәкселеге менән осраштыҡ та инде.

Төбәккә рейтинг нимәгә, тигән һорауға яуап итеп, аналитик, тәү сиратта бюджет аҡсаларын экономиялау өсөн, тип яуап ҡайтарҙы:  

— Рейтингының булыуы, айырыуса юғары рейтингының, республикаға экономияларға,  ә экономияланған аҡсаларҙы, мәҫәлән, яңы мәктәптәргә, дауаханаларға, эш хаҡын күтәреүгә йүнәлтергә мөмкинлек бирә.  

Әлеге ваҡытта Standard & Poor's Рәсәй Федерацияһының 19 субъектының рейтингыһын күҙәтеп бара.

— Был яртыһынан да аҙыраҡ, ләкин бында иң көслө, үҫеште маҡсат итеп ҡуйған төбәктәр генә, — тип һыҙыҡ өҫтөнә алды Борис Копейкин. — Һәм ошо 19 субъекттың ни бары дүртеһенең рейтингыһы Башҡортостан Республикаһыныҡынан юғарыраҡ: был Мәскәү һәм Санкт-Петербург, шулай уҡ нефть һәм газдың төп ресурстары тупланған Ханты-Манси һәм Ямал-Ненец автономиялы округтары.  

Шулай итеп агентлыҡ республиканы ныҡ юғары баһалай. Әммә рейтинг ағымдағы хәлдәр торошон ғына һүрәтләмәй — иң элек был перспективаға ҡараш.

— Республиканы алдағы бер нисә йылда юғары үҫеш күрһәткестәре көтә, улар Рәсәй буйынса уртаса күрһәткестәрҙән юғарыраҡ. Шулай булғас, беҙ ошо көтөлгәндәрҙе лә рейтинг кимәле тураһында ҡарарҙарыбыҙҙа иҫәпкә аласаҡбыҙ, — тип белдерҙе Борис Копейкин. — Яҡын арала иҡтисадтың үҫешәсәге шул иҫәптән бюджетҡа керемдәр артыуын да, сығымдарҙы финанслау, бурыстарҙы ҡаплау мөмкинлеген дә аңлата. Әйткәндәй, әлеге мәлдә Башҡортостандың бурысы  күп түгел, резервтары хәтһеҙ ҙур.