8 декабрь, Кесе йома

28 март 2011 йыл, 9:20

«Рәсәй һәм Ислам донъяһы» конференцияһы йыл һайын үткәреләсәк

автор: Евгений Рәхимҡолов | фото: Олег Яровиков

Рәсәйҙең Ислам донъяһы менән үҙ-ара мөнәсәбәттәренә арналған халыҡ-ара ғилми-ғәмәли конференцияһы традицион сараға әүереләсәк. Был хаҡта яҡташыбыҙ, күренекле сәйәси эшмәкәр Кәрим Хәкимовтың 120 йыллыҡ юбилейына арналған конференцияның пленар ултырышында Башҡортостан Президены Рөстәм Хәмитов белдерҙе.

— Был конференцияның йыл һайын үткәреләсәк сараға әйләнеү ихтималлығы ҙур, — тине Рөстәм Хәмитов. — Ләкин шуныһы асыҡ: беҙ бындай конференцияларҙы мотлаҡ үткәрәсәкбеҙ. Һәм уның ниңә Башҡортостанда үткәрелергә тейешлеге лә аңлашыла. Был территорияла мең йыл инде ислам дине тотола.

Рәсәй менән Ислам донъяһы мөнәсәбәттәре темаһының, Рөстәм Хәмитов фекеренсә, сиге юҡ. Шуға күрә ул йыл һайын тикшереүҙе һәм фекер алышыуҙы талап итә.

— Беҙҙең маҡсат — кешеләргә ислам диненең хеҙмәттәшлеккә өндәүсе, тыныслыҡ яҡлы, традицион конфессия булыуы хаҡында мәғлүмәт еткереү, — тине Рөстәм Хәмитов. — Ислам – ул изгелек һәм тыныслыҡ, ә низағтар дине түгел, кешеләргә тап ошоно төшөндөрөү мөһим.