4 декабрь, Йәкшәмбе

18 март 2011 йыл, 10:30

Рәсәй Дәүләт Думаһында Башҡортостан көндәре үтәсәк

автор: "Башинформ"

21 — 25 мартта Рәсәй Федерацияһы Дәүләт Думаһында Башҡортостан Республикаһы көндәре үтәсәк. Алдағы аҙнаның дауамында Рәсәй парламентында төбәктең социаль-иҡтисади потенциалын һәм инвестицион күркәмлеген күрһәтеүсе күргәҙмә экспозицияһы эшләйәсәк.

БР көндәре программаһы Башҡортостан Президенты Рөстәм Хәмитов, республика Хөкүмәте ағзалары ҡатнашлығында төбәк презентацияһын үткәреүҙе, шулай уҡ республика делегацияһының РФ Дәүләт Думаһы етәкселеге, профилле Комитеттар вәкилдәре, федераль парламент депутаттары менән эшлекле осрашыуҙарын күҙаллай. Башҡа төбәктәрҙән килгән бик күп ҡунаҡтарҙың, атап әйткәндә, Абхазия президенты Сергей Багапштың, ҡатнашыуы көтөлә.  

23 мартта Башҡортостан Республикаһы көндәре сиктәрендә Дәүләт Думаһында РФ Дәүләт Думаһы рәйесе Борис Грызловтың республика делегацияһы менән рәсми осрашыуы үтәсәк, ә 14 сәғәттә Дәүләт Думаһының Бәләкәй залында Башҡортостан Республикаһы презентацияһы үткәрелә, уның аҙағында төбәк башлығы Рөстәм Хәмитов ҡатнашлығында матбуғат конференцияһы планлаштырыла.