10 декабрь, Шәмбе

15 март 2011 йыл, 10:51

Бөтә Рәсәй форумында агросәнәғәт комплексы үҫешенең үҙенсәлектәре тикшереләсәк

автор: Эльмира Сабирова

Башҡорт дәүләт аграр университетында 16 — 17 мартта «Агрокомплекс-2011» халыҡ-ара махсус күргәҙмәһе сиктәрендә ойошторолған «Хәҙерге этапта агросәнәғәт комплексы үҫеше үҙенсәлектәре» Бөтә Рәсәй фәнни-ғәмәли конференцияһы үтәсәк.

Юғары уҡыу йортоноң матбуғат үҙәгенән хәбәр итеүҙәренсә, форумда ҡатнашыусылар ауыл хужалығының артабанғы үҫеше буйынса мөһим мәсьәләләрҙе ҡараясаҡ: климат үҙгәреү шарттарында уңдырышлылыҡты күтәреү, тәбиғәт ресурстарын һөҙөмтәле файҙаланыу һәм һаҡлау, ветеринарияның көнүҙәк проблемалары, аҙыҡ-түлек технологияларын камиллаштырыу, малсылыҡ, архитектура, агроинженерия, иҡтисад һәм ауылдарҙы электрлаштырыу мәсьәләләре.

Сарала БР Ауыл хужалығы министрлығы, Рәсәй, Башҡортостан, Татарстан фәндәр академиялары вәкилдәре, алдынғы ауыл хужалығы предприятиелары етәкселәре һәм белгестәре ҡатнашасаҡ.