3 декабрь, Шәмбе

01 март 2011 йыл, 12:40

Милиция әкренләп полицияға әйләнә

автор: Ольга Мортазина

1 мартта «Полиция тураһында закон» көсөнә инде. Документ бөгөнгө көндән киҫкен үҙгәрештәр күҙалламай. Эске эштәр министрлығы хеҙмәткәрҙәре 2012 йылдың 1 мартына тиклем милиционерҙар булып ҡаласаҡ. Шул ваҡытта ғына улар  яңы «полиция» формаһын кейәсәк. Уны раҫларға һәм тегергә лә кәрәк әле.

Хоҡуҡ һаҡлаусылар эш хаҡының артыуын да әле генә күрә алмаҫ, моғайын. Ул 2012 йылдың 1 ғинуарынан көтөлә ине. Ысынбарлыҡта эш хаҡын арттырыуҙы бер нисә йылға кисектереп тороуҙары ихтимал, сөнки үҙгәртеп ҡороуҙарға аҡса күп китәсәк.  

Киләһе Яңы йылға тиклем аттестациялар һәм штат иҫәбен ҡыҫҡартыу үткәреләсәк. Ведомство структураһы быйыл уҡ үҙгәрергә тейеш.  

— Беҙ федераль министрлыҡтың приказдарын көтәбеҙ, — тип хәбәр итте БР буйынса Эске эштәр министрлығының матбуғат хеҙмәте етәксеһе Максим Родионов. — Милиционерҙар бөгөнгө көндән башлап исеме, фамилияһы, вазифаһы күрһәтелгән бейдждар тағып йөрөргә тейеш. Ә ҡулға алынғандарға телефондан һөйләшеүгә мөмкинлек бирелә.