3 декабрь, Шәмбе

22 февраль 2011 йыл, 13:43

Өфө властары боҙбармаҡтарға һуғыш иғлан итте

автор: Евгений Рәхимҡолов

Өфө властары боҙбармаҡтарға һуғыш иғлан итте. Проблеманы шишәмбе көндө Өфө хакимиәтендә үткән оператив кәңәшмәлә ҡала башлығы Павел Качкаев күтәрҙе.

Уның әйтеүенсә, бөгөн ҡаланың өс районына ҡыйыҡтарҙағы ҡар ҡатламы һәм уның ҡыйыҡ ситенән һалынып тороуы буйынса дәғүәләр бар. Дим районында талаптарға яуап бирмәгән — 17 объект, Совет районында – 11, Калинин районында дүрт объект барлығы асыҡланған.

Павел Качкаевтың билдәләүенсә, һыуыҡтар таҙартылмаған ҡыйыҡтар өсөн аҡланыу була алмай. Эштәр бер нәмәгә ҡарамай башҡарылырға тейеш, сөнки кешеләр ғүмере хәүеф аҫтына ҡуйылыуы ихтимал.

Йыл һайын тиерлек Өфөлә ҡыйыҡтан төшкән боҙбармаҡтар арҡаһында кешеләр һәләк була. Былтыр март айында шундай осраҡ булды: бер көндә ҡыйыҡтан ҡар шыуыуы арҡаһында бер юлы ике ир-егеттең ғүмере өҙөлдө.