4 декабрь, Йәкшәмбе

10 февраль 2011 йыл, 13:49

Учалы районында БР мосолмандары Диниә назараты уҡыусыларға ислам тәғлимәтен өйрәтә

автор: Тимур Рәхмәтуллин

Учалы районында Башҡортостан Республикаһы мосолмандары Диниә назаратының Йәштәр бүлеге вәкиле мәктәп уҡыусыларына ислам тәғлимәттәрен аңлата. Был хаҡта «Башинформ» агентлығына БР мосолмандары Диниә назаратының Йәштәр бүлеге етәксеһе Айнур Арсланов хәбәр итте.

Йәштәр бүлегенең Учалы районындағы вәкиле  Илфат Ишембәтов аҙна дауамында Учалы районы мәктәптәре буйынса йөрөп, йәштәр менән дини ҡиммәттәр хаҡында әңгәмә алып бара. Ул алкоголизм, тәмәке тартыу һәм наркоманияның зыяны хаҡында дини күҙлектән сығып һөйләй.

— Беҙҙең вәкил традицион ислам тәғлимәттәрен аңлата һәм йәштәрҙе дини экстремизмдан тыя, — ти Йәштәр бүлеге етәксеһе. – Лекциялар 4 февралдә башланды һәм 11 февралдә тамамланасаҡ.

Айнур Арсланов әйтеүенсә, БР мосолмандары Диниә назараты үҙ вәкилдәренә  мәктәп директорҙары исеменә лекция үткәреүгә рөхсәт биреүҙәрен һорап яҙылған хаттар бирә. Әлегә бер директор ҙа ризаһыҙлығын белдермәгән.