10 декабрь, Шәмбе

01 февраль 2011 йыл, 16:48

Дәүләт Думаһы һаулыҡ һаҡлау системаһының хоҡуҡ базаһын яңырта

автор: Марина Шумилова

Һаулыҡ һаҡлауҙы реформалаштырыуҙы үҫтереү был өлкәлә закондарҙы үҙгәртеүҙе талап итә, тип билдәләне «Башинформ» агентлығында үткән матбуғат конференцияһында Дәүләт Думаһы депутаты, Һаулыҡ һаҡлау буйынса комитет ағзаһы Сәлиә Мырҙабаева.

Ул һаулыҡ һаҡлау системаһын модернизациялауға ярашлы ҡануниәт базаһын яңыртыу тураһында һөйләне. 2010 йылда Дәүләт Думаһы был өлкәлә ике бик мөһим закон ҡабул итте: дарыуҙарҙың әйләнешен көйләүсе закон (ул дарыу препараттарының хаҡы һәм сифаты айҡанлы граждандарҙың күп һанлы мөрәжәғәттәренә реакция булды) һәм Рәсәй Федерацияһы халҡына медицина ярҙамы күрһәтеү системаһын үҙгәртеүсе мотлаҡ медицина страховкалауы тураһында закон.

— Бер ай эсендә Дәүләт Думаһына халыҡҡа медицина ярҙамы ойоштороуҙың яңы системаһын аныҡ билдәләйәсәк өсөнсө закон проекты киләсәк — «Рәсәй Федерацияһы граждандарының һаулығын һаҡлау нигеҙҙәре тураһында», — тип хәбәр итте депутат. — Былтыр июлдән РФ Һаулыҡ һаҡлау һәм социаль үҫеш министрлығы сайтында уны киң тикшереү бара, бик күп иҫкәрмәләр һәм тәҡдимдәр килде, — тине Сәлиә Мырҙабаева.