8 декабрь, Кесе йома

24 декабрь 2010 йыл, 17:52

Өфөнән Мәскәүгә тағы бер авиарейс асыла

автор: Любовь Колоколова

Башҡортостанда иң популяр авиамаршрут – «Өфө — Мәскәү» — шәмбе, 25 декабрҙә, тағы бер уңайлы рейс менән тулыланасаҡ. Авиаташыуҙарҙың урындағы баҙарына бөгөн тағы бер авиакомпания — «Нордавиа – төбәк авиалиниялары» –  килде. Ул Рәсәй баш ҡалаһына (Шереметьево аэропорты) «Боинг» 737-500 самолеттарында осош яһаясаҡ.

Ошо айҡанлы «Өфө» Халыҡ-ара аэропорты” акционерҙар йәмғиәтенең бизнес-залында матбуғат конференцияһы үткәрелде, унда «Нордавиа» авиакомпанияһы вәкилдәре һәм «Өфө» аэропортының коммерция директоры Олег Микрюков ҡатнашты.

Мәскәүҙән Өфөгә һәм кирегә компания аҙнаһына алты тапҡыр (йәкшәмбенән тыш) осасаҡ. Өфөнән урындағы ваҡыт менән 20 сәғәт 25 минутта сығасаҡ, Шереметьевонан – 14 сәғәт 15 минутта (Мәскәү ваҡыты).

«Нордавиа»ның коммерция директоры Виталий Шахов авиакомпанияның тариф сәйәсәте тураһында һөйләне, ул пенсионерҙар һәм 13 йәшкә тиклемге балалар өсөн арзан билеттар, шулай уҡ төркөм менән осоуға ташламалар тәҡдим итә. Башҡортостанда киләһе йылдан социаль туризм программаһы үҫтереләсәге хаҡында белгәс, Виталий Шахов, компания социаль туристарҙы, иң элек Рәсәй баш ҡалаһына, ташыуҙың льготалы формаһы тураһында һөйләшеүҙәр алып барыуға риза буласаҡ, тип белдерҙе.

— Республика яғынан заявкалар һәм тәҡдимдәр көтәбеҙ, — тине «Нордавиа» вәкилдәре. – Был бик яҡшы эш.