8 декабрь, Кесе йома

29 ноябрь 2010 йыл, 14:31

1 декабрҙә көндәр һыуытасаҡ

автор: Рәсүл Хәмиҙуллин

Шишәмбе, 30 ноябрҙә, Башҡортостан территорияһына әүҙем көньяҡ циклон яҡынлашасаҡ. Көндөҙ һауа торошо ҡырҡа насараясаҡ. Был турала Башҡортостан гидрометеорология һәм тирә-яҡ мөхит мониторингы буйынса идаралығынан (Башгидромет) хәбәр иттеләр.

Республика райондарының күбеһендә көслө ҡар яуыуы, буран сығыуы, елдең тиҙлеге секундына 22-27 метрға тиклем көсәйеүе көтөлә. Юлдарҙы ҡар һырыуы ихтимал.  Башгидромет синоптиктары фекеренсә, был күренештәр 1 декабрҙә лә һаҡланасаҡ, атмосфера баҫымы күтәреләсәк.  

Бынан тыш, Башҡортостанды һыуыҡ тулҡын ҡаплап аласаҡ. 30 ноябрҙән 1 декабргә ҡарата төндә һауа температураһы төнөн 15-20 градус һыуыҡ, аяҙытҡанда минус 25 градусҡа тиклем буласаҡ. Көндөҙ нулдән түбән ике-ете градус буласаҡ. 1 декабрҙән 2-һенә ҡарата төндә – минус 20-25 градус.

Иң һыуыҡ төн 3 декабрҙә көтөлә, термометр бағанаһы ул саҡта 25-30 градус һыуыҡҡа, айырым райондарҙа минус 35 градусҡа тиклем төшәсәк. Ял көндәрендә һауа температураһы яңынан күтәрелә башлаясаҡ.  

темалар: һауа торошо