2 декабрь, Йома

19 ноябрь 2010 йыл, 14:36

Өфөлә банк кассаһында ялған аҡсалар табылған

автор: Ольга Мортазина

Баш ҡала банкыларының береһендә аҡсаны ҡайтанан иҫәпләгәндә мең һумлыҡ утыҙ ялған купюра булыуы асыҡланды. 1997 йыл өлгөһөндәге бер үк серия банкноттары Башҡортостан Эске эштәр министрлығының эксперт-криминалистика үҙәгенә тикшереүгә тапшырылды, ә Иҡтисади енәйәттәргә ҡаршы көрәш идаралығы оперативниктары быға ҡағылышлы кешеләрҙе эҙләүгә тотондо.

Ялған аҡсалар финанс учреждениеһына Өфөнөң Затон баҙарындағы сауҙа нөктәһе хужаһы шәхси эшҡыуарҙан килеүе асыҡланды. Ул, был банкноттар менән Силәбе өлкәһенән йөҙ-ҡиәфәттәре менән Кавказ халҡына оҡшаш ике кеше йәшелсәләр партияһы өсөн түләне, тип хәбәр итте. Хәҙер был мәғлүмәттәр тикшерелә, оперативниктар был алыпһатарҙарҙы эҙләй. Шулай уҡ башҡа версиялар ҙа ҡарала, тип хәбәр иттеләр БР буйынса Эске эштәр министрлығы матбуғат хеҙмәтенән.