7 декабрь, Шаршамбы

09 ноябрь 2010 йыл, 17:38

Торлаҡ төҙөлөшө программаһы торлаҡты арзан һәм уңайлы яһарға булышлыҡ итәсәк

автор: Рәсүл Хәмиҙуллин

Хәҙерге ваҡытта Башҡортостанда эшкәртелгән торлаҡ төҙөлөшө программаһы йорттарҙы сафҡа индереү күләмдәрен ярайһы уҡ арттырыуҙы ҡарай. Мәҫәлән, 2015 йылда — өс миллион, ә 2020 йылда  биш миллион квадрат метрҙан ашыу торлаҡ сафҡа индерергә планлаштырыла. Бында индерелгән торлаҡтың күп өлөшө экологик яҡтан саф, энергия һөҙөмтәлелеге һәм арзан хаҡ талаптарына яуап биреүсе эконом-класс сегментында булырға тейеш.  

Белгестәр баһалауынса, төҙөлөшкә инвестицияланған бер һум кәмендә дүрт һум килем килтерә. Тимәк, төҙөлөш эштәре күләменең үҫеүе һалым керемдәре артыуында ыңғай сағыласаҡ. Шул уҡ ваҡытта йорттарҙың уңайлылығы, торлаҡ фонды торошо, тораҡ пункттарының архитектура йөҙө яҡшырасаҡ.

2011-2015 йылдарға Республика маҡсатлы торлаҡ программаһы үҙ эсенә күп сараларҙы индерә. Улар иҫәбендә – ҡала төҙөлөшө һәм проект документацияһын әҙерләү, торлаҡ төҙөлөшө объекттарын ер участкалары менән тәьмин итеү. Был йүнәлештә эш алып барыла ла инде. Башҡортостанда 54 муниципаль райондың 27-һен территориаль планлаштырыу схемаһы, 12 ҡаланың, шулай уҡ муниципаль райондарҙың административ үҙәктәре булып торған 24 ауылдың генераль пландары эшләнгән. Программаны ғәмәлгә ашырыу осоронда республика һәм урындағы бюджеттарҙан ҡушма финанслау шарттарында бөтә территориаль берәмектәр өсөн яңы генераль пландар эшкәртеүҙе тамамларға планлаштырыла.

Башҡортостанда торлаҡ төҙөлөшөнә 28435 гектар дөйөм майҙан менән ер участкаһы бүлеү ҡаралған. Күрһәтелгән территорияларҙа 25204 мең квадрат метр самаһы торлаҡ төҙөләсәк, был билдәләнгән торлаҡ төҙөлөшө күләмдәрен ер участкалары менән тәьмин итергә мөмкинлек бирәсәк.  

темалар: төҙөлөш, торлаҡ