11 декабрь, Йәкшәмбе

19 октябрь 2010 йыл, 15:43

2011 йылдың 1 июненән дәүләт учреждениелары хеҙмәткәрҙәренең эш хаҡы артасаҡ

автор: "Башинформ"

Республиканың Хеҙмәт һәм халыҡты социаль яҡлау министрлығы халыҡты социаль хеҙмәтләндереү комплекслы үҙәктәре хеҙмәткәрҙәренең эш хаҡын арттырыу мәсьәләһе буйынса аңлатмалар менән сығыш яһаны. Бынан алда социаль өлкә хеҙмәткәрҙәре Башҡортостан Президенты Рөстәм Хәмитовҡа белгестәрҙең эш хаҡы бәләкәй – 4-6 мең һум – булыуына зарланып мөрәжәғәт иткәйне.    

БР хеҙмәт һәм халыҡты социаль яҡлау министры Ринат Тимербаев аңлатыуынса, 2009 йылдың 1 ғинуарынан дәүләт социаль хеҙмәтләндереү учреждениеларында хеҙмәткә түләүҙең яңы системаһы индерелгән. Федераль бюджет учреждениеларының хеҙмәткә түләү фондтары – 30 процентҡа, ә республика дәүләт учреждениеларының 20 процентҡа артҡан.

Министрҙың һүҙҙәренә ҡарағанда, яңы хеҙмәт шарттары эш хаҡын компенсация һәм дәртләндереү түләүҙәре иҫәбенә арттырырға ярҙам итә. Ә окладҡа персональ арттырыу коэффициентын иҫәпкә алып, социаль хеҙмәткәрҙең эш хаҡы 3 тапҡырға артыуы ихтимал.

2011 йылдың 1 июненән республиканың дәүләт учреждениелары хеҙмәткәрҙәренең эш хаҡы фондын 6,5 процентҡа индексациялау ҡаралған, тип хәбәр итә Башҡортостан Хөкүмәтенең матбуғат хеҙмәте.