9 декабрь, Йома

01 сентябрь 2010 йыл, 16:16

Республика кардиологтары өсөн мәктәп-семинар ойошторола

автор: Әлфиә Әһлиуллина

16 сентябрҙә Өфөнөң Конгресс-холында республика кардиологтары өсөн «Кардиология яңылыҡтары: рекомендациялар һәм артериаль гипертонияны һәм йөрәктең ишемия ауырыуын дауалау стандарттары» тип аталған мәктәп-семинары үтәсәк. Мәктәптә уҡыуға табип кардиологтар, йөрәк-ҡан тамырҙары хирургтары, терапевтар, шулай уҡ кафедра хеҙмәткәрҙәре, табип-интерндар, Башҡорт дәүләт медицина университеты студенттары саҡырылған.

«Башинформ» агентлығына Башҡортостан Республикаһының Һаулыҡ һаҡлау министрлығынан хәбәр итеүҙәренсә,  мәктәптә дәрестәрҙе илдең алдынғы кардиологтары алып барасаҡ. Атап әйткәндә, лекциялар менән Рәсәй артериаль гипертония буйынса медицина йәмғиәте президенты, профессор Ирина Чазова, Сеченев исемендәге Мәскәү медицина академияһының клиник фармакология һәм эске ауырыуҙар пропедевтикаһы кафедраһы профессоры, Мәскәү дәүләт медицина-стоматология университетының факультет терапияһы кафедраһы профессоры Ольга Остроумова сығыш яһаясаҡ.