7 декабрь, Шаршамбы

12 июль 2010 йыл, 16:58

Иң яҡшы ташсылар билдәләнде

автор: Рәсүл Хәмиҙуллин

Өфөлә Башҡортостандың төҙөлөш белгестәренең IV Республика  профессиональ оҫталыҡ конкурсының сираттағы этабы үтте. Ул республиканың иң яҡшы ташсыларын билдәләне.

Конкурсты ойоштороусылар — БР Төҙөлөш, архитектура һәм транспорт министрлығы, БР Төҙөүселәр союзы һәм Рәсәй Төҙөүселәр профсоюзының Республика ойошмаһы.

Беренсе урынды «21-се трест» 5-се төҙөлөш участкаһы яуаплылығы сикләнгән йәмғиәте ташсылары Илдар Басиров менән Евгений Абдулбаев яуланы. Икенсе урынды “10-сы төҙөлөш участкаһы” яуаплылығы сикләнгән йәмғиәтенән Руслан Бәҙретдинов менән Радик Исланов алды. Почетлы өсөнсө урында — «3-сө төҙөлөш тресы» асыҡ акционерҙар йәмғиәте ташсылары Рәлиф Ҡотдосов һәм Азамат Мәғзүмов.

Бөтә еңеүселәр һәм призерҙар Хөрмәт грамоталары, аҡсалата премиялар һәм ҡиммәтле бүләктәр менән наградланды.

Конкурстың киләһе этабы 16 июлдә үткәрелә: унда ҡатнашыусылар БР төҙөлөш комплексының иң яҡшы плита һалыусыһы исеме өсөн ярышасаҡ.