8 декабрь, Кесе йома

29 июнь 2010 йыл, 11:03

Һаҡлыҡ банкы аҡсаны юлбаҫарҙарҙан һаҡлауҙың яңы ысулын тапты

автор: Эльвира Латипова

Рәсәйҙең иң ҙур кредит ойошмаһы – Һаҡлыҡ банкы аҡсаны ташыуҙың яңы ысулын индерә. Кесе йома көнө банктың инкассатор хеҙмәтен ҡоралландырыуға тәүге махсус контейнерҙар киләсәк.

Хәйләкәр уйлап табылған әйберҙең үҙенсәлеге – буяу һалынған махсус бокстар ҡуйылыуҙа. Санкцияланмаған асырға маташҡанда контейнерҙағы бөтә аҡсаға таҙартып булмаҫлыҡ буяу ҡойоласаҡ. Был купюраларҙы Үҙәк банкта ғына алмаштырып алырға мөмкин.

Рәсәй Һаҡлыҡ банкының инкассация идаралығы баш экономисы Анатолий Зайцевтың һүҙҙәренә ҡарағанда, юлбаҫарҙар купюраларҙы бер нисек тә ала алмаясаҡ: контейнерҙы нисек кенә асып маташһалар ҙа, махсус бокстар “үҙ эшен эшләйәсәк”.  

Контейнерҙарҙы Швецияның Security Qube System AB фирмаһы эшләгән. Әйткәндәй, Европа өсөн был яңылыҡ түгел: унда буяулы контейнерҙар 20 йылға яҡын файҙаланыла.

Контейнерҙарҙың беренсе партияһын Мәскәү һәм Санкт-Петербург аласаҡ. Аҡрынлап, 2012 йылға тиклем, улар менән Һаҡлыҡ банкының бөтә төбәк подразделениелары йыһазландырыласаҡ.