10 декабрь, Шәмбе

18 июнь 2010 йыл, 16:39

Һыуҙа ла батабыҙ, утта ла янабыҙ

автор: Ольга Мортазина

Уҙған тәүлектә республикала 9 янғын булған, тип хәбәр итә БР буйынса Ғәҙәттән тыш хәлдәр министрлығының Баш идаралығы матбуғат хеҙмәте. Һәләк булыусылар, йәрәхәтләнеүселәр юҡ, әммә, үкенескә күрә, һыу менән бәйле ҡазаларға ҡарата был һүҙҙәрҙе ҡулланып булмай.

44 йәшлек ир Бәләбәй районының Өсән-Ивановка ауылы эргәһендәге быуала батҡан. Ул һыу инеү өсөн яраҡлаштырылмаған урында һыу инә һәм көтмәгәндә һыу төбөнә китә. Ваҡиға шаһиттары уны быуанан алып сыға, әммә ғүмерен һаҡлап ҡала алмай.

Шул уҡ Бәләбәй районында йәнә бер ғәҙәттән тыш хәл була. Анновка ауылы янында халыҡ һыу ятҡылығы буйында ял итә. Уйламағанда 10-се моделле "ВАЗ" тау түбәненә тәгәрәй. Танышы менән машина хужаһы ҡаршыһына сығып, уны туҡтатырға тырыша, ләкин автомобилде тотоп ҡала алмай. Һөҙөмтәлә икеһе лә йәрәхәтләнә һәм дауаханаға эләгә.