8 декабрь, Кесе йома

03 июнь 2010 йыл, 10:46

Башҡортостандың баш ҡалаһында балалар һабантуйы гөрләне

автор: Ирек Мөхәмәҙиев | фото: Андрей Старостин | фото: Андрей Старостин

Өфөлә, Салауат Юлаев исемендәге спорт-һауыҡтырыу комплексы стадионында Халыҡ-ара балаларҙы яҡлау көнөнә арналған балалар спорт байрамы – һабантуй үтте. Уны "Рәсәй терәге" Башҡортостан төбәк бүлексәһе ҡатнашлығында БР Спорт федерациялары берекмәһе ойошторҙо.

"Башинформ" агентлығына берекмәнең башҡарма директоры Рөстәм Мәғсүмовтың хәбәр итеүенсә, республика һәм ҡала спорт федерацияларының алты командаһы тоҡтарҙа йүгереүҙә, эстафетала, армрестлингта уҙышты, бағанала ултырып, тоҡтар менән һуғышты, күҙҙәрен бәйләп көршәк ярҙы, ҡалаҡҡа йомортҡа һалып йүгерҙе, арҡан тартышты. Шулай уҡ сатраш һәм мини-футбол буйынса турнирҙар үткәрелде. БР Парашют спорты федерацияһы тәрбиәләнеүселәре өсөнсө урын алды, РБ Кудо федерацияһы вәкилдәре икенсе урында, ә беренсе урынды һәм БР Спорт федерациялары берекмәһе Кубогы батырҙары исемен БР Косики каратэ федерацияһы егеттәре яуланы.  

Ошо уҡ мәлдә стадионда Еңеүҙең 65 йыллығына арналған Өфө хәрби-патриотик клубтары спартакиадаһы ла үтте. Клуб курсанттары һабантуй программаһы буйынса ярышты, бынан тыш, йүгереүҙә һәм автоматты йыйып-һүтеүҙә етеҙҙәрҙе билдәләне. "Бронза" "Спартак — Центр" клубына тәтене, "көмөш" —  "Смена" тәрбиәләнеүселәренә, ә "Голубые молнии" клубына — "алтын". Бынан һуң 17 майҙа тамамланған парашют-атлетика күп алышы призерҙары һәм еңеүселәре  тейешле наградаларын алды.