5 декабрь, Дүшәмбе

18 май 2010 йыл, 13:21

Бюджет проекттары буйынса Ведомство-ара хөкүмәт комиссияһы ултырышы

автор: Эльвира Латипова

Республика Йортонда бюджет проекттары буйынса Ведомство-ара хөкүмәт комиссияһы ултырышы үткәрелде. Эшкә БР Хөкүмәте Премьер-министрының беренсе урынбаҫары, финанс министры Айрат Ғәскәров етәкселек итте.

Төбәк социаль-иҡтисади үҫешенең төп финанс документы параметрҙарын билдәләүсе төрлө күҙаллауҙар варианттары менән БР иҡтисади үҫеш министры Евгений Евтушенко таныштырҙы. Бюджет процесын ойоштороуҙың яңы принциптары тураһында БР финанс министры урынбаҫары Рида Собханҡолова һөйләне.

Ведомство-ара комиссияның эшен теләгән бер кеше күҙәтә алды: Башҡортостан Республикаһы Хөкүмәтенең рәсми сайтында кәңәшмә тура трансляцияланды.

Республика бюджетын формалаштырыу мәсьәләһе Башҡортостандың һәр гражданына ҡағыла, шуға күрә бюджет процесы перспективаларын тикшереүгә халыҡ та саҡырыла. Айрат Ғәскәров әйтеүенсә, БР Финанс министрлығы һәм БР Иҡтисади үҫеш министрлығы сайттарында бөтә кәрәкле мәғлүмәт материалдары урынлаштырыласаҡ. Шунда уҡ һорауҙар һәм комментарийҙар ҡалдырырға мөмкин. Хөкүмәт комиссияһы граждандарҙың бөтә тәҡдимдәрен ҡарарға һәм уларҙың иң мөһимдәрен бойомға ашырыуға ҡабул итергә әҙер.