2 декабрь, Йома

29 апрель 2010 йыл, 12:36

Еңеү Көнө алдынан Өфөлә йәштәр байрамы үткәрелә

автор: Эльмира Сабирова

Бөйөк Ватан һуғышында Еңеүҙең 65 йыллығына арналған йәштәр байрамы Өфөлә 4 майҙа “Карауанһарай” сауҙа-эш комплексы территорияһында үтәсәк.

«Башинформ» агентлығына БР Йәштәр сәйәсәте, спорт һәм туризм министрлығынан хәбәр итеүҙәренсә, йәштәрҙе ватансылыҡ рухында тәрбиәләү, хәрби-патриотик хәрәкәтте популярлаштырыу, сәләмәт тормош алып барыуҙы пропагандалау һәм, әлбиттә, һуғыш ветерандарын, тыл хеҙмәтсәндәрен һәм республиканың баш ҡалаһы халҡын байрам менән ҡотлау – байрамдың төп маҡсаты.

Программала йырҙар, бейеүҙәр, шиғырҙар ҡаралған. Кадет корпусы, «Витязь-Юниор», «Һуҡмаҡ», «Александр Невский» хәрби-патриотик клубтары курсанттары тамашасыларға ҡул көрәше алымдарын һәм ҡорал менән ҡулланыу оҫталығын күрһәтәсәк.  

Байрам «День Победы» йырын күмәкләп башҡарыу менән тамамланасаҡ. Концерттан һуң ветерандар өсөн тантаналы ҡабул итеү ойошторола.