2 декабрь, Йома

06 апрель 2010 йыл, 9:33

Ишембай трикотаж изделиелар фабрикаһы балаларҙы кейендерә

автор: Рәсүл Хәмиҙуллин

Йәйге миҙгелгә «Ишембай трикотаж изделиелар фабрикаһы» ябыҡ акционерҙар йәмғиәте кейемдең яңы коллекцияһын әҙерләне. «Башинформ» агентлығына предприятиеның баш технологы Ольга Кузнецованың хәбәр итеүенсә, фабрика продукцияһының 60 проценты мәктәпкәсә һәм мәктәп йәшендәге балаларға тәғәйенләнгән. Быға маркетинг нигеҙ бар.

— Йәйге осорҙа балалар кейеменә һорау арта, — ти Ольга Кузнецова. – «Яҙ-йәй – 2010» миҙгеленә 20 модель сығарыла. Яңы коллекциянан элеккесә эске кейем линияһын, эске күлдәктәрҙе, пижамаларҙы билдәләргә мөмкин. Былар барыһы ла – йөҙ процент мамыҡтан етештерелгән экологик кейем. Өҫкө кейемдән джемперҙар, водолазкалар айырым урын алып тора. Улар төрлөсә биҙәлә, принттар ҡулланыла.

Йәйге миҙгелгә Ишембай фабрикаһы моделдәр конструкцияһына яңылыҡ индерҙе. Әгәр бығаса ҡыҙҙар һәм малайҙар өсөн бер төрлө кейем әҙерләнһә, хәҙер улар һәр енес өсөн айырым етештерелә.

Фабрика ассортименты айына өс тапҡыр яңыртыла. Әлеге ваҡытта мәктәп формаһы өҫтөндә эшләйҙәр. Ул да йөҙ процент мамыҡтан торасаҡ. Мәктәп униформаһының төҫтәр гаммаһына килгәндә, классик аҡ һәм ҡара төҫтәр күк, алһыу һәм башҡаларға урын бирәсәк. Мәктәп формаһы менән бергә Ишембай модельерҙары спортзалдарҙа кейеү өсөн комплекттар ҙа етештерә.