4 декабрь, Йәкшәмбе

01 апрель 2010 йыл, 13:03

Рәссам Фәниә Шевчук үҙ эштәрен Өфөлә күргәҙмәгә ҡуя

автор: Әлфиә Әһлиуллина

2 апрелдә Өфөнөң «Мираҫ» галереяһында ғәҙәттән тыш күргәҙмә асыла. Унда Фәниә Шевчуктың картиналары ҡуйыласаҡ. Ул рәссам булараҡ ҡына түгел, «ДДТ» төркөмө лидеры Юрий Шевчуктың әсәһе булараҡ та билдәле. Уның персональ күргәҙмәһе бүләк сифатында ойошторола – быйыл майҙа рәссамдың юбилейы.

«Мираҫ» галереяһының арт-директоры Ольга Рамазанова хәбәр итеүенсә, Өфө тамашасыһына Фәниә Шевчуктың 50-ләп эше — живопись һәм графика тәҡдим ителәсәк.

Рәссамдың ижады тураһында мәҡәләләренең береһендә Санкт-Петербургтағы Рус музейы сәнғәт белгесе Надежда Хмелева шулай тип яҙа:

«Фәниә Әкрәм ҡыҙы 48 йәшендә генә рәссам белеме ала. Нальчикта, һуңынан Өфөлә йәшәгәндә, ул һәүәҫкәр рәссамдар күргәҙмәләрендә ҡатнаша, күп һүрәт төшөрә, портрет менән мауыға. Өйөндә уға балалары, күршеләре, туғандары модель булып хеҙмәт итә.  

Шевчук Петербургта йәшәгән осоронда ғына үҙенең башҡорт милли мәҙәниәте менән бәйләнешен аңлай. Рәссамдар менән бындай хәл йыш ҡына булғылай – алыҫ ара эске бәйләнештәрҙе аса. Йыш ҡына уның натюрморттары камертоны булып башҡорт яулыҡтары, туҡымалары, матур һауыт-һаба һәм аш-һыу тора. Улар Фәниә Шевчуктың ижадына сағыулыҡ, декоратив яңғыраш бирә».

темалар: күргәҙмәләр