4 декабрь, Йәкшәмбе

18 февраль 2010 йыл, 15:01

Өфөлә 55-тән үткәндәр өсөн компьютер түңәрәге эшләй

автор: Әлфиә Әһлиуллина

Өфөнөң ҡала үҙәк китапханаһында оло йәштәге китап һөйөүселәрҙең һорауы буйынса “Компьютер һәм мин – 55 йәштән үткәндәр өсөн” түңәрәге эшләй башланы. Дәрестәр аҙнаһына ике тапҡыр иртәнге сәғәттәрҙә бушлай үткәрелә.

«Башинформ» агентлығына китапхананың компьютер залы мөдире, түңәрәк етәксеһе Эльвина Вәлиеваның хәбәр итеүенсә, әле өс төркөм тупланған, яҙылыу дауам итә.

— Дәрестәребеҙ компьютерҙа эшләргә өйрәнергә теләгән хаҡлы ялға сыҡҡандарға иҫәпләнгән, — ти Эльвина. – Бынан тыш, улар бында шәхси компьютерҙарының архитектураһын, уның менән эшләгәндә хәүефһеҙлек техникаһын да өйрәнә ала.  Шулай уҡ төрлө компьютер программаларын, интернет селтәрен үҙләштереүгә махсус курстар ҙа ҡаралған.  

Етәксе әйтеүенсә, Өфө үҙәк ҡала китапханаһының яңы социаль проектында ҡатнашыусыларҙың тәүге төркөмө бик һәләтле уҡыусылар булып сыҡҡан, шулай ҙа уларға дәрестәр планда ҡаралғанса бер йыл дауамында алып барыласаҡ.

Был түңәрәк эшмәкәрлеге хаҡында тулыраҡ мәғлүмәтте түбәндәге һандарға шылтыратып белергә мөмкин: (347) 232-35-57.