4 декабрь, Йәкшәмбе

04 февраль 2010 йыл, 18:19

Мортаза Рәхимов Рөстәм Миңлехановты Татарстан Президенты вазифаһына һайланыуы менән ҡотланы

автор: "Башинформ"

Башҡортостан Республикаһы Президенты Мортаза Рәхимов Рөстәм Миңлехановҡа Татарстан Республикаһы Президенты вазифаһына һайланыуы менән ҡотлап телеграмма ебәрҙе. Телеграммала шулай тиелә:

"Хөрмәтле Рөстәм Нурғәли улы!

Һеҙҙе юғары вазифаға – Татарстан Республикаһы Президенты булып һайланыуығыҙ менән ихлас ҡотлайым!

Дәүләт Советы депутаттарының Һеҙҙе бер тауыштан хуплауы – республика халҡының, алынған курстың күсәгилешлегенә, социаль-иҡтисади прогресты дауам итеүгә, кешеләрҙең тормош кимәлен яҡшыртыуға өмөттәрен Һеҙҙең менән бәйләп, ышаныс күрһәтеүе ул.

Беҙ Һеҙҙе бик яҡшы дәүләт эшмәкәре, производство һәм идара итеү өлкәһендә бай тәжрибәгә эйә булған сәйәсмән булараҡ беләбеҙ. Яңы вазифала Һеҙ Татарстандың артабанғы үҫешенә, беҙҙең туғандаш республикаларҙың күп яҡлы хеҙмәттәшлеген киңәйтеүгә тос өлөш индерерһегеҙ, тип ышанабыҙ.

Һеҙгә ныҡлы һаулыҡ, именлек һәм бәхет, Татарстан Республикаһы һәм бөтә Рәсәй именлеге хаҡына яуаплы эшегеҙҙә ҙур уңыштар теләйем!

Ихтирам менән, Башҡортостан Республикаһы Президенты М.Рәхимов".