11 декабрь, Йәкшәмбе

07 декабрь 2009 йыл, 10:35

Бөгөн Рәсәйҙә матәм көнө

автор: "Башинформ"

Рәсәй Президенты Дмитрий  Медведев 7 декабрҙе Пермь фажиғәһендә һәләк булыусылар буйынса  Бөтә Рәсәй матәм көнө тип иғлан итте.

Хәтерегеҙгә төшөрөп үтәбеҙ,  Пермь ҡалаһындағы ҡот осҡос янғын үткән шәмбе сыҡты. Алдан фаразлауҙар буйынса, янғындың сәбәбе -  ябыҡ бинала пиротехника ҡулланыуҙың ябай ҡағиҙәләрен боҙоу. Һөҙөмтәлә йөҙҙән ашыу кеше һәләк булды, ауыр йәрәхәттәр алыусылар һаны бихисап.

Башҡортостан Республикаһы Президенты Мортаза Рәхимов  Пермь ҡалаһының төнгө клубында янғын сығыу сәбәпле Пермь крайы губернаторы Олег Чиркуновҡа ҡайғы уртаҡлашыу телеграммаһы ебәрҙе.

“Башҡортостан халҡын Пермдәге фажиғә — төнгө клубта сыҡҡан янғын арҡаһында кешеләрҙең һәләк булыуы  тураһындағы  хәбәр — тетрәндерҙе. Крайҙа йәшәүселәрҙең барыһының да, һәләк булыусыларҙың яҡындарының һәм туғандарының ауыр ҡайғыһын уртаҡлашабыҙ”, — тиелә  Мортаза Рәхимовтың телеграммаһында.