4 декабрь, Йәкшәмбе

19 ноябрь 2009 йыл, 14:22

Стәрлетамаҡ ҡалаһының химик предприятиелары араһында “Сода” асыҡ акционерҙар йәмғиәте – иң яҡшыһы

автор: Эльвира Латипова

Стәрлетамаҡ ҡалаһының химик сәнәғәт предприятиелары араһында  үткәрелгән иҡтисади  ярышта “Сода”  асыҡ акционерҙар йәмғиәте –  иң яҡшыһы, тип танылды. Финанс көрсөгө йоғонтоһона ҡарамаҫтан, производство – хужалыҡ  эшмәкәрлегенең төп  күрһәткестәре юғары кимәлдә һаҡланған.

– Беҙҙең предприятие етештергән кальцийланған сода стратегик сеймал булып тора. Уны ҡулланыу кимәле – иҡтисадтың дөйөм хәленең индикаторы тиергә була. Шуға ла төп күрһәткестәрҙе юғары кимәлдә тотоу беҙҙә ышаныс тыуҙыра, – ти “Сода”ның генераль директоры Сергей  Лобастов.

Иҡтисади ярышҡа йомғаҡлау яһағанда компанияларҙың эшмәкәрлек йүнәлештәре  һәм күрһәткестәр  иҫәпкә алынды: сәнәғәт производствоһы индексы, экспорт күләме, инновацион продукция күләме, уртаса айлыҡ эш хаҡы күләме динамикаһы, конкурстар, йәрминкәләрҙә ҡатнашыу.

Бөгөн был предприятие социаль тармаҡтың барлыҡ обьекттарын да һаҡлап алып ҡалған: ”Юлдаш” балалар сәләмәтләндереү үҙәге, “Сода” мәҙәниәт һарайы, “Содовик” физкультура –сәләмәтләндереү үҙәге,”Шиханы” ял итеү базаһы, “Ҡуш-тау” тау саңғылары базаһы, фельдшерҙар пункты, ғаилә дөйөм ятаҡтары. Компания мәктәптәргә, урта махсус уҡыу  йорттарына һәм балалар баҡсаларына шефлыҡ ярҙамы күрһәтә.

“Сода” асыҡ акционерҙар йәмғиәтенең  матбуғат хеҙмәтененән хәбәр итеүҙәренсә, төрлө кимәлдәге бюджеттарға һәм бюджеттан тыш фондтарға түләүҙәр ғинуар –сентябрь эсендә ярты миллиард һумдан ашыу тәшкил иткән. Уртаса эш хаҡы  – 17 638 һум һәм ул ваҡытында түләнә.

темалар: Сәнәғәт