11 декабрь, Йәкшәмбе

27 октябрь 2009 йыл, 13:03

Хореография училищеһы уҡыусылары Германия һәм Францияла сығыш яһаясаҡ

автор: Әлфиә Әһлиуллина

Рудольф  Нуриев исемендәге Башҡорт хореография училищеһында тәрбиәләнеүсе 40-ҡа яҡын буласаҡ балет артистары Германияла үтәсәк яуаплы гастролдәргә әҙерләнә. Башҡорт хореография училищеһының художество етәксеһе,  Рәсәйҙең атҡаҙанған артисы Леонора Ҡыуатова хәбәр итеүенсә, коллектив 22 ноябрҙә юлға сыға һәм гастролдәр бер ай тиерлек барасаҡ.

– Беҙ  Германияның 20-гә  яҡын ҡалаһында сығыш яһарға тейешбеҙ, – тине Леонора Ҡыуатова. – Улар иҫәбендә Лейпциг, Дрезден һәм башҡалар. Немец тамашасыларына беҙ классик рус балетын  – “Аҡҡоштар күлен”  күрһәтәсәкбеҙ.

Төп ролдәрҙе сығарылыш синыф уҡыусылары, Галина Уланова фонды стипендиаты Анастасия Тихомирова,  Эльдар Йәнгиров, Сабина Саттарова башҡара.

Ошо аҙнала училищеның  тағы ла өс уҡыусыһы йыл һайын Парижда үткәрелгән “Йыһан йәшлеге” халыҡ-ара  балалар коллективтары фестивалендә ҡатнашыу өсөн Францияға юлланасаҡ.

темалар: Фестивалдәр