8 декабрь, Кесе йома

23 октябрь 2009 йыл, 14:29

БДУ-ла “Вуздың 100 йыллығына – 100 изге эш” акцияһы башланды

автор: Эльмира Сабирова

Башҡорт дәүләт университетында  “Вуздың  100 йыллығына – 100 изге эш” акцияһы башланды. Уның сиктәрендә БДУ студенттары һәм уны тамамлаусылар ауыл мәктәптәренә сығып,  уҡыусыларға юғары уҡыу йортоноң тарихы һәм бөгөнгөһө тураһында  һөйләйҙәр. “Башинформ” агентлығына БДУ-ның матбуғат үҙәге етәксеһе Наталья  Никерина хәбәр итеүенсә, бындай осрашыуҙар мәктәп уҡыусыларында ҙур ҡыҙыҡһыныу уята.

Бынан тыш университеттың ижади коллективтары балалар йорттарында ла сығыш яһаясаҡ. Мәҫәлән, Хоҡуҡ институты студенттары Чесноковка балалар йортонда тәрбиәләнеүселәр өсөн концерт программаһы әҙерләй,  ә буласаҡ философтар һәм социологтар Өфө ҡалаһының 9-сы һанлы балалар йортона барырға йыйына.

Үткәреләсәк саралаҙың барыһы ла юғары уҡыу йортоноң 100 йыллығына арналған.

Был осор эсендә вуз тарафынан 113200 белгес әҙерләнгән. Бөгөн университетта 27 меңгә яҡын студент белем ала.

темалар: Юбилейҙар