5 декабрь, Дүшәмбе

28 сентябрь 2009 йыл, 17:43

Мәсетле районы менән Первоуральск Хеҙмәттәшлек тураһында килешеү төҙөнө

автор: Марина Шумилова

       Уҙған ял көндәрендә Башҡортостандың Мәсетле районы менән Свердловск өлкәһенең Первоуральск ҡала округы араһында хеҙмәттәшлек тураһында килешеү төҙөлдө. Килешеүгә Мәсетле районы хакимиәте башлығы Юнир Солтанов менән Первоуральск хакимиәте башлығы Максим Федоров ҡул ҡуйҙы.

       — Мәсетле районы Свердловск өлкәһе менән сиктәш, беҙҙе күп йыллыҡ дуҫлыҡ һәм хеҙмәттәшлек ептәре бәйләй, — тип билдәләне тантанала Юнир Солтанов. Уларҙың тамырҙары — беҙҙең тарихыбыҙҙа, дөйөм данлы эштәребеҙҙә, бөйөк Рәсәй ҡеүәтен нығытыуға төбәктәребеҙҙең индергән өлөшөнөң арта барыуында. Күп милләтле төбәктәребеҙ ҙур рухи-мәҙәни ҡеүәткә эйә. Первоуральскиҙа һәм өлкәнең башҡа ҡалаларында беҙҙең бик күп яҡташтарыбыҙ йәшәй.

       Мәсетлеләр Первоуральскиға буш ҡул менән килмәгән. Еңеү майҙанында ҙур ауыл хужалығы йәрминкәһе үтте, унда район предприятиелары үҙ продукцияһын тәьмин итте. Ә район Мәҙәниәт йортоноң ижади коллективтары йөкмәткеле концерт бүләк итте.