7 декабрь, Шаршамбы

28 сентябрь 2009 йыл, 17:39

"Рәсәйҙең йәш белгестәре" ойошмаһы төҙөлә

автор: Марина Шумилова

       1 октябрҙә Тулала, Фән һәм техника йортонда, Рәсәйҙең йәш белгестәре Дөйөм Рәсәй йәмәғәт ойошмаһының ойоштороу съезы үтәсәк. Унда Федерация Советы рәйесе, "Ғәҙел Рәсәй" сәйәси партияһы лидеры Сергей Миронов, Дәүләт Думаһы депутаттары, илдең 80 төбәгенән йәштәр йәмәғәт ойошмалары активистары ҡатнашасаҡ. Башҡортостандан был форумға БР Дәүләт Йыйылышы-Ҡоролтай ҡарамағындағы Йәштәр йәмәғәт палатаһының Йәмәғәт берекмәләре һәм милли сәйәсәт мәсьәләләре буйынса комиссияһы рәйесе Искәндәр Юлдашев барасаҡ.

       Съезды ойоштороусылар хәбәр итеүенсә, тәүге тапҡыр Рәсәйҙә социал-демократик ҡарашлы йәштәрҙе берләштереүҙе үҙ бурысы итеп ҡуйған йәмәғәт ойошмаһы төҙөлә. Мөмкинлектәр тигеҙлеге — Рәсәйҙең уңышлы киләсәге нигеҙе. Юҡһа, күп йәш кешеләр бөгөн ғәҙелһеҙлек менән бәрелешә: уларҙың мөмкинлектәре һәм перспективалары эш һөйөүсәнлегенә һәм талантына түгел, ә, башлыса, йәшәгән урынына, социаль сығышына, аҡсаһы булыу-булмауға бәйләнгән. Яңы йәмәғәт ойошмаһы тап уларҙың мәнфәғәттәрен яҡларға йыйына.