6 декабрь, Шишәмбе

23 сентябрь 2009 йыл, 17:23

Хеҙмәттәшлек тураһында килешеү төҙөлдө

автор: Эльвира Латипова

       CITOGIC'2009-Өфө конгресында Рәсәй газ йәмғиәте менән "СОПКОР" коммерция булмаған партнерлығы араһында хеҙмәттәшлек тураһында килешеү төҙөлдө. Документҡа Рәсәй Дәүләт Думаһы Рәйесе урынбаҫары Валерий Язев менән "СОПКОР" коммерция булмаған партнерлығы Советы рәйесе Богдан Будзуляк ҡул ҡуйҙы.

       Был килешеүҙе бойомға ашырыу газ үткәргестәрҙең хәүефһеҙлеген һәм уларҙы файҙаланыу ышаныслылығын күтәреүгә йүнәлтелгән.

       — Бындай килешеүҙең Өфөлә CITOGIC конгресында төҙөлөүе мөһим, — тип билдәләне Рәсәй Технологик фәндәр академияһы президенты Борис Никитин. — Бөгөн Рәсәй масштабында 150 мең километрҙан ашыу газ үткәргестәр файҙаланыла. Улар инде бик күптән сафҡа индерелгән. Йыл һайын газ үткәргестәрҙең бер нисә мең километрында профилактик эштәр үткәреү зарур.

       Никитин әйтеүенсә, был йүнәлештә эште әүҙемләштереүгә Саян-Шушенский ГЭС-ындағы фажиғә сәбәп булып тора. Шулай уҡ башҡа сәнәғәт объекттары ла туҙыу сәбәпле, техноген һәләкәттәр тыуыуы бик тә ихтимал.