11 декабрь, Йәкшәмбе

21 май 2009 йыл, 17:30

Эшһеҙлек буйынса пособие алыусылар һаны икеләтә артты

автор: Евгений Рәхимҡолов

Быйыл апрель айында эшһеҙлек буйынса пособие 10,5 мең кешегә тәғәйенләнде. Был уҙған йылдың ошо уҡ осоро менән сағыштырғанда ике тапҡырға күберәк. Ул саҡта пособие 4,9 мең генә кешегә тәғәйенләнгәйне.

БР Хеҙмәт һәм халыҡты социаль яҡлау министрлығы ҡарамағындағы Дәүләт халыҡты эш менән тәьмин итеү хеҙмәте идаралығы мәғлүмәттәренә ҡарағанда, минималь күләмдә эшһеҙлек буйынса пособие алыусылар өлөшө 50 процент самаһы тәшкил итә, ә максималь пособие алыусылар һаны — 22,4 процент. Апрель айында пособиеның уртаса күләме 2598 һум тәшкил итте, был былтырғы кимәлдән (1541 һум ине) күпкә артығыраҡ.

Эшһеҙлек буйынса пособие ярайһы уҡ артыуға ҡарамаҫтан, уның уртаса күләме эшкә һәләтле халыҡтың йәшәү минимумынан байтаҡҡа — 43 процентҡа — кәмерәк булып ҡала.