Уважаемый пользователь, Вы пользуетесь устаревшим браузером, который не поддерживает современные веб-стандарты и представляет угрозу вашей безопасности. Для корректного отображения сайта рекомендуем установить актуальную версию любого современного браузера:

Прочитать в мобильной версии сайта

БАШ

USD 63.84

EUR 70.59

23 сентябрь, Дүшәмбе

Уфа   °

Радий Хәбиров: Башҡортостан сит төбәктәрҙә башҡорт милләтен үҫтереү өсөн яуаплы

Йәмғиәт

ӨФӨ, 2019 йыл, 15 август. /«Башинформ» мәғлүмәт агентлығы, Ләйлә Аралбаева/.

Ырымбур өлкәһендә йәнә Башҡортостан Республикаһы Вәкиллеге асылыуы ихтимал. Был хаҡта Башҡортостан Башлығы вазифаһын ваҡытлыса башҡарыусы Радий Хәбиров Өфөләге Конгресс-холда Рәсәй төбәктәренең башҡорт йәмәғәтселеге вәкилдәре менән осрашыуҙа белдерҙе.

«Республика Вәкиллеге кәрәк, беҙ был хаҡта бер нисә тапҡыр фекер алыштыҡ. Беҙҙә иҡтисади бәйләнештәр шаҡтай тығыҙ, Ырымбурҙың күп кенә эшҡыуарҙары Урал аръяғында эшләй. Республика Хөкүмәтенә йөкләмә бирермен», — тип билдәләне Радий Хәбиров.

Пермь һәм Свердловск башҡорттары «Башҡортостан» сауҙа йорттарын асыуҙа ярҙам һораны. Радий Хәбиров был идеяны хупланы.

«Сауҙа йорто темаһы миңә оҡшай. Эшҡыуарлыҡ һәм туризм буйынса дәүләт комитетынан был мәсьәләне өйрәнеүҙәрен һорармын. Аҡса һорарға ғына түгел, үҙебеҙгә лә аҡса эшләргә кәрәк, ә беҙ тейешле ярҙам күрһәтербеҙ», —  тип иҫәпләй республика етәксеһе.

Осрашыуҙа төбәктәрҙә башҡорт телен уҡытыуҙың көнүҙәк мәсьәләләре лә күтәрелде. Был һорау осрашыуҙа ҡатнашыусыларҙың барыһын да — Татарстан Республикаһы, Силәбе, Ҡурған, Ырымбур, Свердловск өлкәләре, Премь крайы башҡорттарын борсой. Осрашыуҙың модераторы — Дәүләт Йыйылышы рәйесе урынбаҫараы Эльвира Айытҡолова билдәләүенсә, әлеге көндә Силәбе өлкәһендә — 32, Ырымбур өлкәһендә — 12, Ҡурған өлкәһендә өс мәктәптә башҡорт теле уҡытыла.

Ырымбур өлкәһе ҡоролтайының башҡарма комитеты рәйесе Йәғәфәр Яманһарин хәбәр иткәнсә, Ырымбур өлкәһенең Ҡыуандыҡ ҡалаһында ата-әсәләр башҡорт телен өйрәтеүҙе һорап 120 ғариза биргән. Дәреслектәр һәм уҡытыусылар кәрәк.

Төбәк етәксеһе әйтеүенсә, башҡорт телен үҫтереүгә етди иғтибар бүлергә кәрәк, ләкин мәжбүри ысул менән түгел, ә яйлап уны ҡулланыу модаһын индерергә. Бының өсөн республикала башҡорт телен өйрәнеү буйынса заманса мобиль ҡушымталар булдырыу, яңы методикалар индереү буйынса әүҙем эш алып барыла.

Пермь крайы башҡорттары ҡоролтайының башҡарма комитеты рәйесе Рәсил Мөхәмәтйәнов Пермь крайында төньяҡ башҡорттарының диалекты йәшәп килеүе, халыҡты әҙәби башҡорт теленә этаплап өйрәтеүгә йәлеп итергә, тимәк, башҡа программа, башҡа дәреслектәр кәрәклеге хаҡында һөйләне. Уның әйтеүенсә, тәүҙә башҡорт телен өйрәнеүгә бөтәһе өс ғариза яҙылған булһа, аңлатыу эштәренән һуң уларҙың һаны 70-кә еткән.

«Башҡортостан — һеҙҙең тыуған йортоғоҙ, башҡорт милләтен үҫтереү өсөн яуаплы булған Рәсәй Федерацияһы субъекты. Милләттәштәребеҙ, Рәсәй төбәктәренең йәмәғәт ойошмалары менән эште яңы кимәлгә күтәрергә кәрәк, беҙ уға яңы энергия һәм яңы мөмкинлектәр бирергә теләйбеҙ. Йәмәғәт ойошмалары эшмәкәрлеген финанслауҙы арттырыуҙан башланыҡ. Башҡорттарҙы берләштереү өсөн Рәсәй субъекттарында башҡорт тарихи-мәҙәни үҙәктәренең эшен әүҙемләштереү зарур», — тип белдерҙе Радий Хәбиров.

Осрашыу ҡатнашыусыларҙы Башҡортостан Республикаһының Почет грамоталары, Башҡортостан Республикаһы Башлығының рәхмәт хаттары менән бүләкләү һәм иҫтәлеккә фотоға төшөү менән тамамланды. Рәсәй төбәктәренең башҡорт йәмәғәтселеге вәкилдәре менән ошондай форматта осрашыуҙарҙы йылына ике тапҡыр уҙғарыу хаҡында килештеләр.

http://www.bashinform.ru/news/1340297-v-regionakh-rossii-mogut-poyavitsya-eshche-odno-predstavitelstvo-i-torgovye-doma-bashkortostana/

                    

Яндекс цитирования
Рейтинг ресурсов "УралWeb"
закрыть